Ramdevji Ro Byaav Mandyo Bhajan Lyrics रामदेवजी रो ब्याव मंड्यो

रामदेवजी रो ब्याव मंड्यो........ 

स्थाई :- रामदेवजी रो ब्याव मंड्यो रूणीचे।।
सोने रे पाट बैठाय बाबो तेल चढ़्यो रूणीचे,

हे, तेल चढ़्यो हल्दी रंग चढ्यो रूणीचे,
अजमल जी रो कँवरो आज सज्यो है बींद बण्यो रूणीचे।।

ढोल नगारा आज घुरया आँगणिये।।

बाई लाछा सुगणा नाचे गावे, कोड करे आँगणिये,

हे,कोड करे भाई पीठी करे आँगणिये,

केसरिया बागो तुर्रा किलंगी बाबो बींद बण्यो आँगणिये।।

हिन्दवाणो सूरज चमके है, चमके है।।

तंवराँ रो कँवरो बींद बण्योड़ो पलके है, पलके है,

हे कमर कटारो हाथ में भालो भलके है,

लीले अस्वारया आज बाबो मुलके है, मुलके है।।

ओलो-दोलो निरखे बनड़ी, बनड़ो केड़ो फूटरो,

ओलो-दोलो निरखे नेतल, बनड़ो केड़ो-केड़ो फूटरो,

ईने अजमल जी सिणगारियो ए नेतल बनड़ी बनड़ो एड़ो फूटरो,

ईने अजमल जी सिणगारियो ए बनड़ी बनड़ो एड़ो फूटरो।।

गेरो-गेरो निरखे बनड़ी बनड़ो केड़ो फूटरो,

गेरो-गेरो निरखे नेतल बनड़ो केड़ो-केड़ो फूटरो,

ईने बीरमदे सिणगारियो ए बनड़ी बनड़ो एड़ो फूटरो,

ईने बीरमदे सिणगारियो ए बनड़ी बनड़ो एड़ो -एड़ो फूटरो।।

गेरो-गेरो निरखे सासू बनड़ो केड़ो फूटरो,

गेरो-गेरो निरखे सासू बनड़ो केड़ो-केड़ो फूटरो। 

ईने हडबू जी सिणगारियो ए नेतल बनड़ो केड़ो फूटरो। 

ईने हडबू जी सिणगारियो ए बनड़ी बाबो लागे फूटरो।।

ओलो-दोलो निरखे सखियाँ, बनड़ो केड़ो फूटरो। 

गेरो-गेरो निरखे सखियाँ, बनड़ो केड़ो फूटरो। 

ईने मेणादे सिणगारियो ए नेतल बनड़ो एड़ो फूटरो,

ईने सुगणा बाई सिणगारियो ए बनड़ी बनड़ो एड़ो फूटरो।।

जल्ला रे, मैं तो राज रा डेरा निरखण आई रे। 

ओ म्हारी जोड़ी रा जल्ला, हो मिरगा नैणी रा जल्ला। 

मैं तो राज रा डेरा निरखण आई रे, राज।।

सोढ़ा रे आँगण आज बाबो परणीजे जी परणीजे। 

ओ तो अमरकोट रे माँय बाबो परणीजे जी परणीजे। 

नेतल रो खुलियो भाग बाबो परणीजे जी परणीजे। 

पगल्यां दे पगां चलाय बाबो परणीजे जी परणीजे। 

चँवरया में पकड्यो हाथ बाबो परणीजे जी परणीजे। 

ओ तो तीन लोक रो नाथ बाबो परणीजे जी परणीजे। 

ओ तो मुलक मुलक पग राख बाबो परणीजे जी परणीजे। 

ए तो फेरा लीना चार बाबो परणीजे जी परणीजे।।

पेलो फेरो फिरियो नेतल, बाबोसा री लाडली। 

दूजो फेरो फिरियो नेतल, माताजी री धीवड़ी। 

तीजो फेरो फिरियो नेतल, काका री भतीजी। 

चौथो फेरो फिरियो नेतल, होया रे पराया।। 

सेंवरिया रा दान बाई रा बाबोसा तो देवे, आई रे धरमियाँ री वेला ओ राज। 

गायां भेस्यां दान बाई ने माताजी तो देवे, आई रे धरमियाँ री वेला ओ राज। 

हाथां रा हथफूल बाई ने मामोसा तो देवे, आई रे धरमियाँ री वेला ओ राज।।

दो नी बाबोसा बाई ने दायजो रे म्हारी नेतल बाई सासरिये जाय। 

दो नी बाबोसा बाई ने दायजो रे म्हारी नेतल बाई सासरिये जाय।।

मोरिया रे माँय म्हारे बाबोसा री लाडक चाली सासरे ओ राज, मोरियो। 

मोरिया रे माँय म्हारे काकाजी री लाडक चाली सासरे ओ राज, मोरियो। 

मोरिया रे माँय म्हारे बुआ री भतीजी चाली सासरे ओ राज, मोरियो।।

               ✽✽✽✽✽

यह भजन भी देखे 

ऊँचो भवानी थांरो देवरो Uncho Bhawani Tharo Dewaro

Bhilani Rangili Bhajan Lyrics भीलणी रंगीली

Shravan kumar Bhajan Lyrics श्रवण कुमार

Marudhar Me Jyot Jagay Gayo मरुधर में जोत जगाय गयो

Samay Ko Bharoso Koni समय को भरोसो कोणी

CLOSE ADS

CLOSE ADS